Біздің Жапонияға саяхаттау тәжірибеміз

Қанша тұрады?
Виза алу
Сапарға дайындық
Тұрғын үй (қонақүйлер)
Дәмханалар мен тағамдар
Жапонияда не көруге болады?
Шопинг
Үйге не алып келуге болады?
Төлем жасау жолдары
Сапарда не қажет болмады?
Кішігірім кеңестер.

Бірден ең басты сұрақтан бастайық – мұндай сапар қанша тұрады?

Саяхаттың екі нұсқасы бар: өз бетіңізше немесе тур құрамында бару. Бірінші нұсқа – арзанырақ. Ғаламторда әуебилеттерді қосқанда бүкіл сапар бір адамға 800-900 мың теңгеге шыққан көптеген нұсқаулықтар бар.

Мысалы, тревел-блогер Аманның мына нұсқаулығы. Онда 13 күндік сапар (тұру, ұшу, тамақтану, трансферлер, экскурсиялар мен ойын-сауық) бір адамға 783 мың теңгеге шыққан. Сілтеме.

Екінші мысалда – дәл сондай бағдарламасы бар сапар бір адамға 840 мың теңге болған. Жазбаны оқып шығу өте пайдалы болады. Сілтеме. Жалпы, Жапонияда алатын тәжірибе мен эмоциялар үшін бұл аса қымбат емес деп ойлаймыз.

Екі гайдтағы ақпаратты да міндетті түрде оқып шығыңыздар, онда қонақүйлердің атаулары мен басқа да көптеген пайдалы мәліметтер бар.

Егер сіз дайын тур сатып алсаңыз, турагенттіктерде 7-10 күндік сапар әдетте бір адамға 1,1 млн-нан 1,3 млн теңгеге дейін тұрады. Егер туристік маусымда (сакура гүлдеген кезде) барсаңыз, турдың құны 1,5-1,7 млн теңгеге дейін жетуі мүмкін.

Бұл сомаға әдетте қонақ үй, виза рәсімдеуге көмек, қалааралық барлық ішкі жол жүру шығындары, гид, барлық ойын-сауық орындарына кіру билеттері және туристтік сақтандыру кіреді. Егер турды алдын ала брондасаңыз, әуебилеттер осы құнның ішіне кіруі мүмкін. Саяхат шағын топ құрамында өтеді.

Жапонияға дайын турларды көптеген компаниялар сатады. Мысалы, Sweatberry, Rabbit Tours, aruandiyaz.travel сияқты блогерлер және т.б. Біз олармен бармағандықтан, нақты пікір айта алмаймыз. Егер оларға жүгінуді шешсеңіз, парақшалары мен пікірлерді алдын ала зерттеп алған жөн. Ал біз досымыз әрі тревел-блогер Данат Әлиевпен бірге бардық. Ол турларды сирек ұйымдастырады, бірақ биыл сәті түсіп, жолымыз болды. Данат хабарландыруларды әдетте алдын ала өз парақшасында жариялайды.

Тамаққа, шопингке және ойын-сауыққа қанша ақша алу керектігін шамамен мына жазбадан немесе мына Google кестеден түсінуге болады. Онда егжей-тегжейлі талдау жасалған. Кестені біз жасаған жоқпыз, оны осы жерден алдық.

Жапония визасы:

Бұл тақырып бойынша да жақсы нұсқаулықтар өте көп, бірақ біз визаға өзіміз тапсырдық, сондықтан бұл мақаланың ең пайдалы бөлімі болмақ. Қажетті ақпараттың 90%-ы Aviasales kz ұсынған мына нұсқаулықта бар. Барлығын сол бойынша істесеңіз, бәрі сәтті болады. Ал төменде түсініксіз жерлерге жауап таба аласыздар.

Ең басты кеңес: барлығын Жапония елшілігінің сайтында көрсетілгендей жасаңыз (гайдтардағы ақпарат ескіруі немесе бланкілер жаңаруы мүмкін, сондықтан түпнұсқамен салыстырып отырыңыз). Егер туристік сапармен бара жатсаңыз – «Туристік сапар» бөліміндегі құжаттар тізімін қараңыз.

Туристік сапарға арналған құжаттар тізімі:
Визалық сауалнама (2 дана)
Шетелдік төлқұжат + көшірмесі
Сапар шығындарын өтеу мүмкіндігін растайтын құжат
Сапар бағдарламасы (Travel Itinerary)
Әуе билеттерінің броньдары
Сенімхат (құжаттарды сенімді тұлға арқылы тапсырған жағдайда)

Құжаттарды басып шығарып/көшірмесін алып, сайттағы тізім бойынша рет-ретімен жинау керек. Құжаттың көшірмесі түрлі-түсті немесе ақ-қара болғаны маңызды емес. Файл да қажет емес, степлермен қыстырудың да керегі жоқ.

Сауалнама 3,5 х 4,5 см өлшемді фотосуреті жапсырылған екі данада болуы керек. Мен өз сауалнамамды екі бетке былай толтырдым:

Маңызды: сауалнамаға төлқұжаттағыдай қол қойыңыз.

Екінші кеңес: Travel Itinerary (сапар жоспары) бланкісін мұқият толтырыңыз. Бұл – виза офицері қарайтын ең маңызды құжаттардың бірі. Тым егжей-тегжейлі жазу міндетті емес, бастысы түсінікті әрі қисынды болуы керек. Мысалы, «Osaka-да бос күн» немесе «Tokyo Disneyland-ке бару» деген сияқты. Барлығы сіздің сапарыңызға сай болуы тиіс. Тоқтайтын қонақүйлердің атаулары мен нөмірлерін жазыңыз, сондай-ақ жоспардың басы мен соңына әуе рейстеріңіздің нөмірлерін жазыңыз.

Дайын құжатты толық жариялай алмаймын, өйткені оны Данат жасаған, сондықтан оған құқығым жоқ.

Үшінші кеңес: Визаға құжат тапсыру үшін төлем қабілеттілігін банк үзіндісімен немесе жұмыс орнынан алынған жалақы көрсетілген ресми анықтамамен растау керек. Бірақ жұмыс орнынан анықтама өткізу міндетті емес (елшілік сайтында солай көрсетілген), біз жай ғана Kaspi Gold пен Freedom-нан соңғы 3 айдағы үзінді көшірмелерді тапсырдық (қаласаңыз, бұдан да ұзақ кезеңді қамтуға болады). Kaspi-де үзіндіні былай алынады: қосымшаның басты бетінен → «Менің Банкім» → «Kaspi Gold» → «Ақпарат» → «Анықтамалар» → «Қолжетімді қалдық туралы (үзіндімен)». Одан кейін уақыт аралығын таңдап → «Қолдану» → «Анықтаманы жүктеп алу» батырмасын басыңыз.

Әселде ЖК болғандықтан, біз қосымша ЖК талоны мен хабарламасын қостық. Тағы білуімізше, кейбір ЖК-сы бар адамдар Kaspi Gold үзіндісінен бөлек Kaspi Pay-ден де 3 айлық үзінді тапсырып, виза алған. Бірақ бұл да міндетті емес.

Шотта қанша сома болуы керектігін елшілікте айтпайды. Данат өз тәжірибесіне сүйеніп, шамамен 2 млн теңге көрсеткен дұрыс деп кеңес береді. Дегенмен, сома неғұрлым көп болса, соғұрлым жақсы. Әсіресе туристік маусымның қызған шағында бағалардың бәрі қымбаттайды, сондықтан елшілік «сапарға қаражат жеткіліксіз» деп санап, виза бермей қоюы мүмкін.

Жалпы, бұрын Жапонияға виза 99% жағдайда берілетін. Бірақ соңғы жылдары туристер саны көбейгендіктен, олар адамдар ағынын әдейі шектеп жатыр.

Төртінші кеңес: Әуебилет пен қонақүйге тапсырыс беру. Құжат тапсыру үшін билетті сатып алудың қажеті жоқ, оны брондап, сол броньды тіркесеңіз жеткілікті. Егер визаға дейін билет сатып алуды шешсеңіз – қайтару мүмкіндігі бар тарифті рәсімдегеніңіз дұрыс.

Қонақүйге келетін болсақ – біз алғашқы тұратын жеріміздің ақысын бірден төлеп, тапсырысты тіркедік. Бұл міндетті құжаттар тізіміне кірмесе де, біз осылайша сенімдірек болады деп шештік.

Бесінші кеңес: банк үзінділерімен құжаттарыңыз тым қалың болып кетсе, уайымдамаңыз. Біздің топтағы бірнеше адам өте көп беті бар құжат өткізді, бәрі сәтті өтті. Елшіліктегілер парақтардың санына (банк үзіндісі көп орын алса да) аса қарамайтын сияқты.

Құжаттарды Жапония елшілігіне мына мекенжай бойынша тапсыруға болады: Астана қ., Чубары шағын ауданы, Космонавтов көшесі, 62, 5-қабат. Құжаттарды қабылдау уақыты: 9:30-дан 12:00-ге дейін, тірі кезекпен.
Виза тегін, құжат тапсырғаннан кейін 5 жұмыс күні ішінде беріледі.
Визаны алғаннан кейін сізге 90 күндік «дәліз» беріледі, осы уақыт аралығында Жапонияға баруыңыз керек. Бірақ Жапонияда виза бойынша 15 күннен артық болуға болмайды.

Туристік маусым кезінде барып-қайту билеттері шамамен 300–350 мың ₸ тұрады. Маусым жақындаған сайын баға өседі. Мысалы, билеттерді сакура гүлдейтін кезеңге (наурыз–сәуір) бір ай қалғанда алсаңыз, барып қайту бағасы жүгімен бірге шамамен 450–500 мың ₸ болады. Ұшу күні жақындаған сайын бұл сома да өсе береді.

Науқандар кезінде өте арзан билеттер кездеседі, мысалы барып-қайту әуебилетін 150 мың ₸-ге алуға болады. Оларды Freedom Travel және Aviasales арқылы іздеген ыңғайлы. Егер жолыңыз болып, мұндай билет тапсаңыз, Жапонияға саяхат айтарлықтай үнемді болуы мүмкін. Сонымен қатар, билет сатып алғаныңыз үшін кешбэк алуға болады: толығырақ.

Біз баратын күндерге ең тиімді баға промокод пен кешбэкті есепке алғанда Freedom Travel-де болды.

Егер сіз бұрын Freedom арқылы әуе билетін сатып алмаған болсаңыз, төлемнің ең соңғы бетінде «промокод» бөлімін белсендіріп, TRVL42 кодын жазып, «Қолдану» батырмасын басыңыз. Сонда билетке қосымша 5000 теңге жеңілдік беріледі.

Біздің топ Токиоға Қытай немесе Сеул (Оңтүстік Корея) арқылы ұшты. Біздің бағытымыз: Астана – Сеул (Air Astana), Сеул – Токио (Asiana Airlines) болды, қайтарда да дәл солай.

Лайфхак: Asiana мен Air Astana арасында келісім бар, сондықтан жүгіңізді Астанадан бірден Токиоға дейін (және кері қарай) рәсімдей аласыз. Билеттерді бөлек сатып алсаңыз да, тіркеу кезінде бұл туралы айтсаңыз жеткілікті.

Сеулде бізде ұзақ транзит болды, сондықтар біз алдын ала K-ETA рәсімдеп, қалаға қыдыруға шықтық. Егер сіз де солай істегіңіз келсе, маңызды кеңес: биылдан бастап K-ETA-дан бөлек, ұшуға бір тәулік қалғанда шағын кедендік декларация толтыру қажет. Ол да K-ETA сайтында бар. Біз мұны өткізіп алдық, соның салдарынан Сеул әуежайында бұл шаруа ұзаққа созылып, уақыт жоғалтып алдық (Wi-Fi нашар болды, ал Кореяға eSIM қоспаған едік).

K-ETA бойынша нұсқаулықты әріптестеріміздің сілтемесінен немесе ресми сайттан оқуға болады. Сондай-ақ, бейненұсқаулық та бар.

Сеулдан біз Токиоға ұшып келдік. Токиода екі әуежай бар: Ханэда және Нарита. Біз Ханэда әуежайына қонатын рейсті таңдадық (ол қаланың ішінде орналасқан). Ал Нарита әуежайынан Токиоға дейін пойызбен шамамен екі сағат жүру керек, сапарды жоспарлағанда осыны ескеру қажет.

Жапониядағы такси – әлемдегі ең қымбат таксилердің бірі. Егер ұшағыңыз түнгі 23:00-ден кейін қонса (бұл уақытта метро жұмыс істемейді), қонақ үймен бірге алдын ала трансферге де тапсырыс берген дұрыс. Бұл сәл арзанырақ түседі. Мысалы, Booking-те мұндай мүмкіндік бар. Біз минивэнмен қонақүйге дейін 35 минут жүріп, 38 000 теңге төледік. Бұл әуежайдан такси ұстағаннан гөрі арзан. Орташа алғанда, Токио ішінде такси бағасы арақашықтыққа байланысты 6000₸-ден басталып, өсе береді.

Енді сапардың өзіне көшейік. Үйден шықпас бұрын не істеу керек:

1) Google Maps жүктеп алыңыз. Ол қоғамдық көлік кестесін, метро картасын және жалпы бағыттарды өте дәл көрсетеді. Пойыздар кестесі бойынша бүкіл сапарда тек екі рет қана қателесті, ол да шағын қалаларда.
2) Роумингті Қазақстанда болғанда сатып алыңыз, сонда әуежайға қонған бойда интернетке қосыла аласыз. Біз MobiMatter (виртуалды eSIM) пайдаландық – интернет өте жақсы әрі тұрақты жұмыс істеді. Бағасы ұқсас балама нұсқа – Airalo қосымшасы. Сондай-ақ, жақында Freedom Super App-та eSIM пайда болды, бірақ біз тексеріп үлгермедік. Қазір ең тиімді бағалар сонда болуы мүмкін. Толығырақ мына жерде

Кеңес: Егер интернет бәрін нұсқаулық бойынша жасасаңыз да істемесе, мына жолмен тексеріңіз: баптаулар — ұялы байланыс — сатып алынған eSIM нөмірі — роумингті қосу (iPhone-да осылай қосылады).

3) GO (GO Taxi / Japan Go) қосымшасын жүктеңіз. Оның басты артықшылығы – қазақстандық нөмірмен тіркеліп, өз картаңызды тіркей аласыз. GO такси Uber-ге қарағанда арзанырақ және барлық ірі қалаларда жақсы жұмыс істейді.

Айта кетерлік жайт, кішігірім ауылдарда (мысалы, Фудзи тауының етегінде) таксиді «қол көтеріп» тоқтатуға тура келді, жалпы ол жақта такси өте аз. Көбіне бәрі автобуспен жүреді.

4) Метро және қоғамдық көлік үшін Suica картасы қажет. Ол тікелей Apple Pay-ге тіркеледі және телефоныңыз өшіп қалса да жұмыс істей береді. Оны да үйден, интернет жақсы болып тұрғанда жүктеп алған дұрыс. Suica картасын ашу және толықтыру бойынша нұсқаулық мына жерде. Егер толтыру қиын болса, Mastercard картасымен байқап көріңіз.

Бұл картамен тек қоғамдық көлікте емес, кейбір дүкендер мен мейрамханаларда да төлем жасауға болады. Метрода жүру құны шамамен 600₸, ал жалпы 10 күндік белсенді сапарда қалааралық жүріс-тұрысқа ~ 80 000₸ жұмсадық.

5) Google Translate қосымшасын жүктеп, бірден жапон тілін орнатып алыңыз. Бұл жергілікті тұрғындармен сөйлесуге көмектеседі, себебі ол жақта ағылшын тілін білетіндер аз.

6) Қандай заттар алу керек? Ең бастысы – барынша ыңғайлы аяқ киім. Жапонияда турист күніне орта есеппен 20 000 қадам жасайды. Егер аяқ киіміңіз ұзақ серуенге қолайсыз болса, сол жерден сапалы әрі ыңғайлы аяқ киім сатып алуға болады. Жергілікті брендтерден Onitsuka Tiger, Hoka, Asics дүкендері танымал. Ал Nike мен Adidas Қазақстанға қарағанда шамамен 2 есе арзан.

Біз сакура гүлдеген кезде (наурыз-сәуір) бардық, бұл уақытта ауа райы құбылмалы болды. Сондықтан «қабаттап» киінген дұрыс: қажет кезде тез шешіп не киіп алуға ыңғайлы. Мысалы, таңертең күрте, жемпір, бас киіммен шықсаңыз, бірнеше сағаттан кейін жейдемен ғана жүре аласыз.

Маңызды кеңес: Сапарға мүмкіндігінше аз зат алыңыз. Жапонияда пайдалы әрі ерекше тауарлар өте көп және жалпы ол жақтағы шопинг әлемдегі ең тиімді әрі арзан болып саналады. Сондықтан саяхатшылар ол жақтан чемодандарын толтырып қайтады.

Айтпақшы, шопинг туралы (неге заттарды өзіңізбен тасымай, сол жерден сатып алған тиімді екенін) кейін егжей-тегжейлі айтып беремін.

Тұрғын үй (Қонақүйлер):

Біз APA Hotel желісіне тоқтадық, олар Жапонияда өте көп таралған. Бұл – орташа баға сегментіндегі қонақүйлер, бірақ қызмет көрсету сапасы мен бөлмелері өте жақсы. Сонымен қатар, барлық жерде дерлік таңғы ас бөлменің құнына кіреді.

Жалпы, Жапонияда қымбат қонақүй алудың аса мәні жоқ, өйткені сіз ол жерге тек түнеу үшін барасыз. Бөлмелердің ауданы өте жинақы (кішкентай) екенін ескеру қажет. Сондықтан егер сіз жұп болып саяхаттасаңыз, бір Double нөмірден көрі екі Single нөмір алған тиімдірек әрі ыңғайлы болуы мүмкін. Айта кетерлігі, сингл-нөмірдегі төсек қатты кішкентай емес – ені шамамен 100 см, қаласаңыз екі адам да сиып кетеді. Ал екінші нөмірде заттар мен чемодандарды сақтау ыңғайлы болады.

Қонақүйдегі бөлмемізге Room tour:

Тағы бір қызық нәрсе: әр бөлмеде арнайы A2 BioCare спрейі тұрады. Ол бір түнде киіміңізді «жаңа ғана жуылғандай» күйге дейін тазартып, балғындық сыйлайды.

Спрей туралы толығырақ мына видеода айтып өттім:

Дәмханалар мен тағамдар:

Жапонияда тез әрі ыңғайлы тамақтану үшін ең оңай шешім – Seven-Eleven дүкендері. Бұл жай ғана супермаркет емес, нағыз «ыңғайлы дүкен». Онда тамақтанып қана қоймай, дайын ас, дәрі-дәрмек, қолшатыр сатып алуға, фотосурет басып шығаруға, тіпті картаңыздан ақша шешуге болады. Айтпақшы, 7-11-дегі тағамдардың бәрі дәмді, өйткені оларды Жапонияның үздік аспаздары дайындайды (жыл сайын мәзірді кім жасайтынын анықтау үшін арнайы байқау өтеді).

Тіпті бір минут ішінде өзіңізге дәмді жеміс смузиін дайындап алуға болады:

Сонымен қатар, онда бірден ыстық сусындар тұратын сөрелер бар! Кофе, шәй және т.б.

Жапонияның дәмханалары мен мейрамханаларында шошқа еті көп қолданылатынын ескерген жөн. Ал егер дәмді әрі арзан суши жегіңіз келсе, Sushiro желісіне барыңыз!

Жапонияда не көруге болады және оған қанша уақыт қажет:

Tokyo (3 күн): Гинза ауданында шопинг (12 қабатты Uniqlo, швейцариялық ON аяқ киім дүкені), Сибуя қиылысы, Shibuya Sky мұнарасы (билеттерді 2 апта бұрын алдын ала сатып алу керек, 5 минут ішінде таусылып қалады). Warner Brothers Harry Potter студиясы.

Kyoto (1-2 күн): 1000 қақпа (Fushimi Inari Taisha), жапондық дәстүрлі үйлер орналасқан Гион ауданы (мұнда 200 жылдық ғимаратта Starbucks орналасқан). Қалаға панорамалық көрінісі бар Kiyomizu-dera ғибадатханасы. TeamLabs (болашақ мұражайы) — видеода көрсетілген.

Osaka (3 күн): Дотонбори ауданы (жапондық Таймс-сквер), Hitachi Towers (жанында жақсы суши-мейрамханасы бар), Universal ойын-сауық паркі.

Nara (жарты күн): Нара паркіндегі бұғыларды тамақтандыру.

Fujikawaguchiko (1 күн): Фудзи тауы, Fuji-Q Highland паркіндегі Наруто аймағы.

Қосымша айта кететін жайт, ойын-сауық орындарына және қалааралық Синкансэн пойыздарына билеттерді бізге Данат сатып алып берді, сондықтан оларды нақты қалай алу керек екенін білмеймін. Бірақ бұл қиындық тудырмайды деп ойлаймын, ақпаратты интернеттен оңай табуға болады.

Шопинг:

Ең басты кеңес: төлқұжатыңызды әрдайым өзіңізбен бірге алып жүріңіз. Кез келген жерде сатып алған затыңыздың сомасы 5000 иеннен (шамамен 15 000 теңге) асса, паспорт бойынша сізге бірден Tax Free (10% жеңілдік) жасап береді. Мұны кассирдің өзі 1 минут ішінде рәсімдейді. Бірақ 2026 жылдың қарашасынан бастап ережелер өзгереді – Tax Free тек әуежайда жасалатын болады.

Tax Free жүйесіндегі өзгерістер:

2026 жылдың 1 қарашасынан бастап бажсыз сауда жүйесі өзгереді. Енді 10%-дық тұтыну салығы сатып алу кезінде бірден төленеді, ал қаражатты қайтару үшін ұшар алдында өтінім беруі керек. Tax Free үйге пошта арқылы жіберілетін тауарларға қолданылмайды – оларды кеденде жеке көрсету қажет болады.

Жапонияда қазақстандықтар ең бірінші Uniqlo дүкеніне асығады.

Мен мұның себебін енді түсіндім – онда киімдердің сапасы өте жоғары, ал бағасы LC Waikiki немесе DeFacto деңгейінде. Көпшілік бұл брендтің киімдері жылдар бойы жуылса да жақсы күйде сақталатынын айтады.
Мен өз гардеробымды толықтай жаңарттым десем де болады: 40 затқа (футболкалар, жейделер, күртелер, шалбарлар, спорттық костюм және т.б.) шамамен 300 000₸ жұмсадым.

Маған Uniqlo-ның тағы бір ұнаған тұсы – өлшемдерінің тұрақтылығы. Мысалы, сіз L өлшемді бір киімді киіп көріп, ол сізге шақ келсе, онда 98% ықтималдықпен сол өлшемдегі басқа киімдер де сізге сай келеді. Мен бір жейдені киіп көрдім де, содан кейін осы өлшемдегі бірнеше затты алдым, бәрі де шақ келді. Өз өлшеміңізді біліп алсаңыз, кейін киімдерге еш қиындықсыз онлайн тапсырыс бере аласыз.

Өзіңізге немесе сыйлыққа алуға болатын Uniqlo-ның ең өтімді тауарларының тізімі:

Бананка-сөмкелер — унисекс үлгісінде, бағасы арзан (шамамен 4500₸) және ішіне таңғаларлық көп зат сыйады. Серуенге өте ыңғайлы. Қазақстанда оларды 12–14 мың теңгеге сатады.
Heattech термокиімі— жұқа, бірақ жылы, денеде мүлдем білінбейді. Ең жұқа түрі (қаптамасында ешқандай жазуы жоқ) далада жүруге де, бөлме ішінде де ыңғайлы. Қалыңдау түрлері табиғатқа немесе тауға шығуға арналған, бөлме ішінде ыстық болуы мүмкін. Бағасы шамамен 6000₸.
Ультражеңіл күртелер мен жилеттер (PUFF Tech) — салмағы мүлдем сезілмейді және өте аз орын алады. Жинап, жиынтықтағы қапшығына салып қоюға болады. Бағасы 18–20 мың ₸.

Бүкіл сапар барысында біз түрлі қалалардағы 10 Uniqlo дүкенінде болдық. Алдын ала ChatGPT немесе Gemini-ден қай қалада қай дүкен үлкен әрі таңдауы көп екенін сұрап алған дұрыс. Сондай-ақ, Google Maps-тегі рейтингіне де қарауға болады. Өйткені кейбір дүкендер кішкентай, онда таңдау өте аз. Ал Токиодағы атақты 12 қабатты дүкенге туристік тәжірибе ретінде барып қайту керек. Онда да тауарлардың көбі сыймаған (қабаттарының ауданы өте кішкентай).

Біз болған ең керемет Uniqlo Осакадағы мына дүкен болды: Uniqlo Shinsaibashi. Онда тауарлардың таңдауы өте көп! Тіпті Токиодағы 12 қабатты дүкенде болмаған Роджер Федерермен бірлескен эксклюзивті спорттық топтама осы жерде ілулі тұрды. Сондай-ақ, Осакадағы Uniqlo Umeda дүкенінде де таңдау тамаша болды. Ал Токиода Uniqlo DiverCity Tokyo Plaza дүкені ұнады.

Басқа сатып алатын заттарға келсек: техника, сыйлықтар, косметика, сағаттар, ойыншықтар, азық-түлік немесе қосымша чемоданды — Bic Camera үлкен гипермаркетіне (8-9 қабатты) табуға болады. Олар Жапонияда өте көп. Онда сөзбе-сөз айтқанда бәрі бар және бағалары өте тиімді. Сондай-ақ, онда оптика дүкендері де бар. Егер ол жерден көзілдірік жиегін таппасаңыз, Owndays дүкенін қарап көріңіздер.

Рилстарда көбіне Don Quijote немесе Daiso сияқты дүкендерді ұсынатынын көрдім, бірақ Bic Camera-дағы сатып алулар жеңілдік купондары мен кешбэк арқылы әлдеқайда тиімдірек шығады. Бұл базар емес, онда Apple, Tissot, Garmin және т.б. брендтердің ресми дүкендері орналасқан.

Достарыңыз бен әріптестеріңізге сыйлық алу үшін де сол жерге барыңыздар. Сыйлықтың ең танымал әрі қызықты түрі – ерекше дәмдері бар жапондық KitKat.

Өзіме Garmin сағатын сатып алдым. Егер Қазақстанда ол ~ 360 000₸ тұрса, Bic Camera-дан оны 190 000₸-ге алдым. Ол үшін мен Tourist Privilege купоны бойынша жеңілдікті (санатқа байланысты 10%-ға дейін), сонымен қатар Tax-Free-ді (тағы -10%) және картаға келетін кешбэкті (Freedom Bank бойынша менде 6%) пайдаландым. Осылайша, әр сатып алудан 26%-ға дейін үнемдеуге болады.

Осы жылдың соңына дейін жарамды купон:

Жапониядан тағы не әкелуге болады:

Желпуіш (Bic camera)
Orient, Citizen немесе Seiko жапон сағаттары (Bic Camera-да сатылады).
On Cloud кроссовкалары – бүкіл әлемде олар орта есеппен 150 000₸ тұрады. Ал Жапонияда, Токионың Гинза ауданындағы ресми дүкенде (12 қабатты Uniqlo-ның жанында) – 70 000₸. Егер бұл брендтің аяқ киімін бірінші рет алатын болсаңыз, CloudTilt моделін ұсынамын. Бұл олардың ең өтімді тауары әрі мен киген ең ыңғайлы аяқ киімдердің бірі.
Киімдегі жағымсыз иістерді кетіруге арналған спрей (киімді сирек жууға мүмкіндік береді, тер мен жағымсыз иіс молекулаларын жояды). Егер чемоданыңызда орын болса, маған да біреуін ала келіңізші 🫣 Бұл спрейлер 7-11 немесе Bic Camera-да сатылады, олардың сапасы менің қонақүйімде тұрған спрейден еш кем емес.

Lion Smile 40 EX Gold Mild көз тамшылары – бір айға жуық қолданып жүрмін, нәтижесіне өте ризамын. Көптеген адамдардың бұл тамшыларды жылдап сатып алатынын естіген болатынмын.
Аллергияға қарсы Matsukiyo Suttomoa AG Nasal Spray Plus мұрын спрейі – өте жақсы құрал, тозаң маусымында өзіңізді жақсы сезінуге көмектеседі.

Meiji Macadamia Chocolate жапон шоколады.
Банан, матча, чизкейк, шабдалы, құлпынай және т.б. дәмдері бар KitKat.

Саяхатта немен төлеген дұрыс?

Кез келген жерде дерлік Apple Pay және Google Pay арқылы төлеуге болады. Шетелде, соның ішінде Жапонияда жасалған әрбір сатып алу үшін Freedom картасына 6%-ға дейін кешбэк қайтарылады. Егер сізде бұл карта әлі жоқ болса, мына нұсқаулық бойынша ашып, ол туралы біздің гайдты оқи аласыз.

Сауда орталықтарындағы екі дүкенде жанасусыз төлемді қабылдамай, физикалық картаны сұрады (бізде болмады). Сондай-ақ, кішігірім қалаларда көбіне қолма-қол ақша қажет.

Жалпы, сапар барысында біз 300 доллар айырбастадық және бұл сома бүкіл саяхатқа жетті. Ақшаны алдын ала айырбастай ақ, кез келген 7-11 дүкеніндегі банкоматтардан карта арқылы бірден шешіп алуға болады.

Сапарда қажет болмаған заттар:

Көктемгі күрте. Біз сол жерден Uniqlo-дан 18 000 теңгеге жылырақ күрте сатып алдық. Ол жиналғанда кіп-кішкентай қапшыққа сыйып кетеді, салмағы жоқ және орын алмайды. Қазақстанда мұндай күртелерді 45 000 теңгеге сатады.
Қонақ үйге арналған үй киімдері. APA Hotel желісінде күн сайын нөмірімізге таза кимоно әкеліп беріп отырды, онымен жүру де, ұйықтау да өте ыңғайлы. Тәпішке де берілді. Жалпы, Жапонияда аяқ киімсіз жүру керек жердің бәрінде сізге тәпішке береді.
Гигиеналық заттар да нөмірде болды: қырыну ұстарасы, сусабындар, гельдер, шашқа арналған телпек, жөке , шаш резеңкесі, тарақ – осының бәрі күн сайын жаңартылып тұрды.

Шағын кеңестер:

Жапонияға қашан бару керек (немесе бармаған жөн) екені туралы Google-дан мақалалар оқып немесе жасанды интеллектпен кеңесіп көріңіз. Әр маусымның өз артықшылықтары мен кемшіліктері бар, сондықтан бәрі сіздің мақсатыңызға байланысты.
Мұнда шайпұл қалдыру қалыптаспаған, бірақ шағын сыйлықтар беруге болады.
Қоғамдық орындарда, әсіресе метро мен пойыздарда дауыстап сөйлесу әдепсіздік болып саналады.
Токиода асықпайтын адамдар эскалатордың сол жағында тұрады, ал оң жағымен асыққандар жүреді. Осакада – керісінше.
Жапонияға жеміс-жидек пен көкөніс алып кіруге болмайды – әуежайда 10 000$-ға дейін айыппұл салынуы мүмкін.
Чемодан жинағанда «матрёшка» әдісін қолданған тиімді: заттарыңызды қол жүгіне салып, оны бос үлкен чемоданның ішіне салыңыз. Қайтар жолда үлкен чемоданыңыз сатып алған заттар мен сыйлықтарға толы болады.
Егер ұзақ серуендеуден шаршап, әлсіреп қалсаңыз, Q&P Kowa Alpha Drink атты жапондық энергетикалық сусынын алып көруге болады. Ол 7-11 дүкендерінде немесе кез келген дәріханада сатылады. Бұл біз үйренген кәдімгі энергетик емес, нағыз дәрумендер кешені мен шөп сығындыларынан тұратын коктейль (мысалы, женьшеньннен). Ол денені жақсы сергітеді, соның арқасында мен күн сайын 20-30 мың қадам жасай алдым. Бірақ міндетті түрде құрамын қарап, аллергияңыз жоқ екеніне көз жеткізіңіз.

Қорытынды:

Жапония – алғашқы сәттен-ақ өзіне ғашық ететін ел. Ол жақта бәрі өте ерекше көрінгенімен, іс жүзінде ұсақ-түйегіне дейін ойластырылған. Біздің кеңестеріміз пайдалы болып, уақытыңыз бен қаражатыңызды үнемдеуге көмектеседі деп үміттенемін. Ал сіз сапарыңызды барынша жайлы өткізіп, тек жақсы әсерлер алыңыз ✨

2026-04-29 14:40